Mae bellach modd cyflwyno cais am Gynllun Interniaethau Polisi Ymchwil ac Arloesi y DU (UKRI) 2026/27, gan gynnig cyfle cyffrous i ymchwilwyr doethurol gael profiad uniongyrchol o lunio polisïau.
Mae’r cynllun arbennig hwn yn galluogi myfyrwyr doethuriaeth a ariennir gan UKRI i ymgymryd â thri mis o leoliad gyda grŵp dethol o sefydliadau polisi hynod ddylanwadol. Caiff interniaethau eu cynllunio i ddigwydd ochr yn ochr â dyfarniad doethuriaeth bresennol myfyrwyr, gan ddarparu cyfle unigryw i gymhwyso ymchwil academaidd mewn cyd-destunau polisi yn y byd go iawn.
Mae’r cynllun yn agored i fyfyrwyr presennol Ysgol Graddedigion Gwyddorau Cymdeithasol Cymru (YGGCC). Rhaid cynnal interniaethau yn ystod cyfnod ariannu Ymchwil Ôl-raddedig. Os yw’r interniaeth ym mlwyddyn olaf ysgoloriaeth y myfyriwr, rhaid ei chwblhau cyn dyddiad gorffen y dyfarniad (cyn i unrhyw gyfnod estyniad gael ei gymhwyso). Gall yr interniaeth hefyd gyfrif fel lleoliad Ymarfer wrth Ymchwilio i fyfyrwyr y dechreuodd eu cyllid ar ôl mis Hydref 2024.
Rhaid i fyfyrwyr sy’n astudio ar fisa myfyriwr wirio eu cymhwystra i ymgymryd â lleoliad ysgoloriaeth, yn enwedig pan mae hyn yn gofyn am estyniad i gyfnod yr ysgoloriaeth.
Mae’r interniaethau yn cael eu cydlynu gan uned Talent a Sgiliau UKRI a thimau Ymgysylltu â’r Cyhoedd a Pholisi ESRC, ar ran holl Gynghorau Ymchwil UKRI.
Sut i wneud cais
Mae manylion llawn, gan gynnwys:
- Sefydliadau partner lletyol sydd ar gael
- Cyfleoedd lleoliad gwaith penodol
- Canllawiau a ffurflenni i gyflwyno cais
ar gael drwy Ddarganfyddwr Cyllid UKRI a thudalen we Cynllun Interniaethau Polisi UKRI.
Cyfnod 1 — Dylai myfyrwyr gysylltu â swyddfa ymchwil eu hysgol neu adran cyn gynted â phosibl i ddeall a oes dyddiad cau cyflwyno mewnol perthnasol.
Mynegi diddordeb: Rhaid i ymgeiswyr lenwi ffurflen mynegi diddordeb Interniaeth UKRI 2026 YGGCC. Rhaid anfon hyn at enquiries@wgsss.ac.uk dim hwyrach na dydd Llun, 24 Awst 2026. Dyma’r dyddiad cau diweddaraf; rydym yn annog ceisiadau cynnar yn gryf. Ni fyddwn yn ystyried ceisiadau hwyr.
Cam 2 – Bydd YGGCC yn e-bostio canlyniad eich cais atoch erbyn dydd Mawrth, 1 Medi 2026. Os byddwch yn llwyddiannus, bydd YGGCC yn dychwelyd templed y ffurflen gais atoch gyda’r datganiad ategol gofynnol i ddeiliad y Grant Hyfforddi.
Cam 3 – Dilynwch broses fewnol eich prifysgol i gyflwyno’ch cais ar-lein drwy dudalen we cynllun Interniaethau Polisi Gwasanaeth Cyllido UKRI. Bydd eich cais yn cael ei anfon i swyddfa ymchwil eich prifysgol i’w wirio, ac yna caiff ei gyflwyno i UKRI. Y dyddiad cau cyffredinol i gyflwyno ceisiadau i’w derbyn gan UKRI yw 16:00, dydd Mawrth 8 Medi 2026. Rhaid i chi gyflwyno’ch cais i’ch prifysgol mewn digon o amser er mwyn sicrhau ei fod yn cael ei gyflwyno i UKRI cyn y dyddiad cau.
Anfonwch ymholiadau am y cynllun ymgeisio i: PolicyInternships@ukri.org
Darperir manylion cyswllt partneriaid lletyol unigol yn y ddogfen Gwybodaeth am Bartneriaid Lletyol.