Mae YGGCC yn dyfarnu dros 70 o ysgoloriaethau’r Cyngor Ymchwil Economaidd a Chymdeithasol (ESRC) bob blwyddyn ar draws 15 llwybr achrededig wedi’u lleoli mewn 7 prifysgol sy’n cydweithio.
Mae dwy gystadleuaeth ar gyfer ysgoloriaethau YGGCC; y Gystadleuaeth Gyffredinol, a’r Gystadleuaeth Gydweithredol.
Gystadleuaeth Gyffredinol
Mae’r Gystadleuaeth Gyffredinol yn cael ei chynhyrchu gan yr ymgeisydd; mae’n rhaid i chi gyflwyno eich prosiect PhD eich hun.
Gystadleuaeth Gydweithredol
Mae’r Gystadleuaeth Gydweithredol yn cael ei chynhyrchu gan oruchwyliwr; rydych chi’n dewis o blith catalog presennol o brosiectau.
Cyllid
Mae ysgoloriaethau YGGCC yn talu ffioedd dysgu, cyflog byw di-dreth blynyddol yn unol ag isafswm cyfraddau UKRI (£19,237 ar hyn o bryd) ac mae’n cynnwys mynediad at Grant Cymorth Hyfforddiant Ymchwil.
Cliciwch yma i gael mwy o wybodaeth am gyllid
Mae YGGCC wedi ymrwymo i ehangu mynediad ac i hyrwyddo cynwysoldeb. Mae’n bosib y bydd unrhyw fyfyriwr sy’n gorfod talu costau ychwanegol mewn perthynas â’u hastudiaethau oherwydd anabledd neu gyflwr iechyd hirdymor, yn gymwys i gael grantiau drwy’r Lwfans i Fyfyrwyr Anabl.
Gall y Lwfans dalu am offer a threuliau bob dydd ac am gynorthwywyr anfeddygol fel gweithwyr cymorth, tiwtoriaid arbenigol, cymorth llyfrgell a swyddog cymryd nodiadau (mae angen hawlio costau llungopïo a nwyddau traul drwy eich Grant Cymorth Hyfforddiant Ymchwil). Nid yw swm pob lwfans yn sefydlog ac fe’i pennir yn unol ag anghenion unigol pob myfyriwr.
Ar ôl derbyn ysgoloriaeth ymchwil YGGCC, rydym yn argymell yn gryf eich bod yn trafod unrhyw anghenion cymorth ychwanegol gyda’ch sefydliad cartref yn y lle cyntaf, gan roi gwybod i’r Swyddog Anabledd perthnasol eich bod yn cael eich hariannu gan yr ESRC.
Cydraddoldeb, Amrywiaeth a Chynhwysiant
Mae YGGCC wedi ymrwymo i gefnogi a hyrwyddo cydraddoldeb ac amrywiaeth a chreu amgylchedd cynhwysol i bawb. Rydym yn croesawu ceisiadau gan bob aelod o’r gymuned fyd-eang waeth beth fo’u hoedran, anabledd, rhyw, hunaniaeth rhywedd, ailbennu rhywedd, statws priodasol neu bartneriaeth sifil, beichiogrwydd neu famolaeth, hil, crefydd neu gred na chyfeiriadedd rhywiol. Yn unol â’n hymrwymiad i gefnogi a hyrwyddo cydraddoldeb, amrywiaeth a chynhwysiant, a chynyddu recriwtio gan grwpiau a dangynrychiolir ar hyn o bryd, rydym yn annog ac yn croesawu’n benodol geisiadau gan ymgeiswyr Du Prydeinig, Asiaidd Prydeinig, pobl o leiafrifoedd ethnig a hil gymysg Prydeinig, y rhai sy’n gadael gofal ac ymgeiswyr sy’n byw ag anableddau. Rydym yn gweithio i gael gwared ar rwystrau i astudio i bawb ac fel rhan o’n proses recriwtio i adolygu eich cais yn ei gyfanrwydd. Rydym yn gwerthfawrogi myfyrwyr o bob cefndir a phrofiad bywyd.
Cliciwch yma i gael mwy o wybodaeth am Gydraddoldeb, Amrywiaeth a Chynhwysiant
Mae anghydraddoldebau strwythurol hanesyddol ac arferion gwahaniaethol mewn addysg wedi arwain at dangynrychiolaeth o gymunedau penodol yn y byd academaidd. Mae YGGCC wedi ymrwymo i nodi ac i fynd i’r afael ag effeithiau’r gwahaniaethu hwn ar ei phrosesau a’i dyfarniadau ei hun. Mae mesurau sy’n gyson â Deddf Cydraddoldeb 2010 yn cynnwys menter sy’n caniatáu llwybrau i gyflwyno enwebiad ysgoloriaeth ychwanegol yn eu cystadleuaeth gyffredinol am ysgoloriaethau, ar yr amod bod o leiaf un o’r ymgeiswyr hynny o gefndir Du Prydeinig, Asiaidd Prydeinig, hil gymysg Prydeinig neu o leiafrifoedd ethnig Prydeinig. Gwahoddir pob ymgeisydd i nodi’r ffyrdd y mae eu profiad bywyd a’r heriau y maent wedi’u hwynebu yn eu galluogi i wneud cyfraniad cadarnhaol i gymuned YGGCC.
Mae rhagor o wybodaeth am strategaeth Cydraddoldeb, Amrywiaeth a Chynhwysiant y YGGCC ar gael ar ein tudalen Cydraddoldeb, Amrywiaeth a Chynhwysiant.
Pwy sy’n gymwys
Mae ysgoloriaethau’r Cyngor Ymchwil Economaidd a Chymdeithasol (ESRC) ar gael i fyfyrwyr sy’n dangos drwy eu cymwysterau academaidd a’u cyflawniadau eraill eu bod wedi’u cymhwyso’n dda i wneud ymchwil ddoethurol. Mae gradd israddedig dda (dosbarth cyntaf neu ail ddosbarth uwch, neu gymhwyster cyfatebol) mewn disgyblaeth berthnasol yn bwysig. A ninnau’n gwerthfawrogi rhagoriaeth, rydyn ni’n ceisio ehangu cyfranogiad ac yn croesawu ceisiadau gan fyfyrwyr sydd wedi mynd i brifysgolion y tu allan i ‘Grŵp Russell’ yn ogystal â phrifysgolion sy’n aelodau ohono.
Cliciwch yma i gael mwy o wybodaeth am gymhwysedd
Ni chaniateir i fyfyrwyr amser llawn sydd wedi sicrhau ysgoloriaeth gan ESRC fod â swydd amser llawn, swydd rhan-amser barhaol na swydd dros dro am gyfnod estynedig o amser yn ystod cyfnod y dyfarniad. Ni chaniateir i fyfyrwyr rhan-amser sydd wedi sicrhau ysgoloriaeth gan ESRC fod â swydd amser llawn.
Mae ysgoloriaethau Ysgol Graddedigion Gwyddorau Cymdeithasol Cymru (YGGCC) ar gael i fyfyrwyr cartref a rhyngwladol (gan gynnwys myfyrwyr yr UE a’r AEE) ar gyfer mynediad o fis Hydref 2023 ymlaen. Bydd pob ymgeisydd yn gymwys i gael dyfarniad llawn sy’n cynnwys talu cyflog cynnal a chadw a ffioedd dysgu yn ôl y gyfradd ar gyfer sefydliadau ymchwil yn y DU. Rhaid i ymgeiswyr fodloni gofynion newydd ar gyfer bod yn gymwys i gael ysgoloriaeth gan Ymchwil ac Arloesedd y DU (UKRI). I gael rhagor o fanylion, ewch i wefan UKRI.
Myfyrwyr cartref
Er mwyn cael statws myfyriwr cartref, rhaid i ymgeiswyr fodloni’r meini prawf canlynol:
- Bod yn wladolyn yn y Deyrnas Unedig (yn bodloni gofynion preswylio), neu
- Bod â statws wedi setlo, neu
- Bod â statws cyn-setlo (yn bodloni gofynion preswylio), neu
- Bod â chaniatâd amhenodol i ddod i’r Deyrnas Unedig neu i aros yma.
Os nad yw ymgeisydd yn bodloni unrhyw un o’r meini prawf uchod, bydd yn cael ei ystyried yn fyfyriwr rhyngwladol. I gael rhagor o fanylion, gweler canllawiau UKRI wedi’u diweddaru ar gymhwysedd UE a rhyngwladol.
Myfyrwyr Rhyngwladol
Mae hyd at 30% o ysgoloriaethau wedi’u hariannu’n llawn YGGCC ar gael i fyfyrwyr rhyngwladol fesul carfan. Bydd ymgeiswyr llwyddiannus yn derbyn ysgoloriaeth a ariennir yn llawn YGGCC ac ni chodir y gwahaniaeth ffioedd arnynt rhwng cyfradd y Deyrnas Unedig a chyfradd ryngwladol.
Nid yw dyfarniadau YGGCC ESRC yn talu costau fisa, gordaliadau iechyd mewnfudo (IHS) na chostau teithio myfyrwyr rhyngwladol.
Cysylltwch â’r tîm Derbyn Myfyrwyr yn y sefydliad rydych am wneud cais iddo os ydych yn ansicr o’ch statws.
Mathau o Ysgoloriaethau ymchwil
Mae hyd y cyfnod astudio yn dibynnu ar brofiad ymchwil blaenorol ac anghenion hyfforddiant a fydd yn cael eu hasesu drwy gwblhau Dadansoddiad o Anghenion Datblygu Cychwynnol ar y cam ymgeisio, a Dadansoddiad o Anghenion Datblygu Llawn cyn ei ddyfarnu os yn llwyddiannus. Yn seiliedig ar hyn, gall hyd y dyfarniad amrywio o 3.5 i 4.5 mlynedd amser llawn (neu gymhwyster rhan-amser cyfatebol). Mae anghenion hyfforddiant yn cael eu nodi a’u diwallu ar sail hyblyg a phwrpasol drwy’r Dadansoddiad o Anghenion Datblygu, a gaiff ei wirio yn ystod pob blwyddyn astudio. Nid yw cymhwyster lefel meistr fel arfer yn cael ei gynnwys yn y dyfarniad, er y gellir ei gynnig lle nodir hynny gan lefel yr hyfforddiant blaenorol, ac i sicrhau hygyrchedd dyfarniadau YGGCC.
Hyd Dyfarniadau
3.5 BLYNEDD
3 blynedd o PhD
3 mis o leoliad
+3 mis o amser hyfforddiant ychwanegol
3.75 BLYNEDD
3 blynedd o PhD
3 mis o leoliad
+6 mis o amser hyfforddiant ychwanegol
4.0 BLYNEDD
3 blynedd o PhD
3 mis o leoliad
+9 mis o amser hyfforddiant ychwanegol
4.5 BLYNEDD
Blwyddyn o Radd Meistr
3 blynedd o PhD
3 mis o leoliad
+3 mis o amser hyfforddiant ychwanegol
Dadansoddiad o Anghenion Datblygu
Dadansoddiad o Anghenion Datblygu (neu DNA) yw’r broses y mae Ysgol Graddedigion Gwyddorau Cymdeithasol Cymru (YGGCC) yn ei defnyddio i bennu anghenion hyfforddi’r rhai sy’n cael ysgoloriaethau ganddi. Mae’r broses hon yn ein helpu ni i gynllunio ein darpariaeth hyfforddi a hefyd i bennu hyd y dyfarniad rydyn ni’n ei roi i dderbynwyr ysgoloriaethau, yn unol â’r anghenion hyfforddiant rydyn ni’n eu nodi.
Mae ysgoloriaeth PhD ESRC yn golygu mwy na chyflwyno prosiect ymchwil gwych yn unig. Mae’n bwysig ei hystyried fel rhaglen hyfforddi lefel uchel sy’n arwain at greu Gwyddonwyr Cymdeithasol amryddawn, sy’n gallu mynd ymlaen i ystod o yrfaoedd. Bydd y broses DNA yn eich helpu i feddwl yn ehangach am eich datblygiad personol a phroffesiynol, ac nid dim ond am anghenion y prosiect ymchwil penodol y byddwch chi’n gweithio arno. Efallai bod hyn yn ffordd wahanol o edrych ar radd PhD o gymharu â’r ffordd draddodiadol, ac mae’n bosibl y bydd angen i chi feddwl ychydig yn wahanol hefyd.
Ein nod yw eich cefnogi chi a’ch goruchwyliwr/goruchwylwyr academaidd i lunio cynllun hyfforddiant sydd wedi’i deilwra i’ch anghenion penodol chi, sy’n hyblyg ac sy’n cyfrannu at yr ystod lawn o sgiliau ddylai fod gan wyddonydd cymdeithasol sy’n graddio o raglen hyfforddiant doethurol. Rydyn ni’n mapio hyn ar sail Canllawiau Datblygiad Ôl-raddedig yr ESRC, a chaiff ei groesgyfeirio â’r Fframwaith Datblygu Ymchwilwyr Vitae. Mae’n bosibl y bydd anghenion hyfforddi yn cael eu diwallu drwy gyfuniad o gyrsiau yn y sefydliad cartref a chyfleoedd hyfforddi ehangach a ddarperir gan ein rhwydwaith o gydweithredwyr sydd un ai ar-lein, neu wyneb yn wyneb yn achlysurol.
Mae dau gam i’r broses DNA. Y DNA cychwynnol (iDNA) a’r DNA Llawn.
DNA cychwynnol (iDNA)
Mae’r Dadansoddiad o Anghenion Datblygu cychwynnol (iDNA) yn digwydd ar ôl i chi gael eich enwebu am ddyfarniad gan eich llwybr. Mae’n gyfle i gael trafodaeth gychwynnol rhwng ymgeisydd enwebedig a’u goruchwyliwr/goruchwylwyr posibl, gan rannu profiadau hyfforddiant blaenorol* a myfyrio ar eu hanghenion yn y dyfodol, a sut gallai’r YGGCC eu diwallu. Os yw’r enwebai hwnnw’n mynd ymlaen i fod yn llwyddiannus yn ein cystadleuaeth, bydd yn ddefnyddiol i’r Arweinydd Hyfforddiant weithio gyda nhw a’u goruchwyliwr i gyflawni DNA Llawn.
Cliciwch yma i gael mwy o wybodaeth am DNA cychwynnol (iDNA)
Ffurflen fer ar-lein yw’r iDNA. Ni ddylai gymryd mwy nag 20 munud i’w llenwi, ac mae’n gofyn i chi (a’ch darpar oruchwyliwr) fyfyrio ar eich profiad mewn categorïau eang o ddatblygiad sgiliau, o safbwynt proffesiynol a phersonol. Mae hefyd yn gofyn am amcangyfrif o hyd y dyfarniad rydych chi’n credu bydd ei angen arnoch chi. Rydyn ni hefyd yn defnyddio data dienw yr iDNA gan y garfan gyfan o enwebeion i’n helpu i gefnogi ein strategaethau cydraddoldeb, amrywiaeth a chynwysoldeb ac ehangu cyfranogiad.
Cyfrifoldeb y darpar oruchwyliwr yw cyflwyno’r iDNA i’r YGGCC, a dylai’r ymgeiswyr gydweithio gyda’u goruchwyliwr i sicrhau ei fod yn cael ei gyflwyno a’i ddychwelyd.
*Rydyn ni’n ymwybodol bod gan fyfyrwyr gefndiroedd a phrofiad amrywiol. Fel rhan o’n hymrwymiad i ehangu cyfranogiad, ni fyddwn yn ystyried gwybodaeth am hyfforddiant blaenorol fel rhan o’n penderfyniad i roi dyfarniad i chi ai peidio. Dim ond fel rhan o’r DNA Llawn y bydd hyn yn cael ei ystyried, hynny yw ar ôl cytuno ar ddyfarniad mewn egwyddor.
DNA Llawn
Mae’r DNA Llawn yn ffurflen fanylach ar-lein. Bydd yn cymryd tua awr i’w llenwi. Dyma ail gam y broses DNA, a dim ond gan ysgolheigion YGGCC sydd wedi derbyn Dyfarniad mewn Egwyddor ac sy’n paratoi ar gyfer eu blwyddyn gyntaf o astudio y caiff ei chwblhau.
Cliciwch yma i gael mwy o wybodaeth am DNA Llawn
Rydyn ni’n argymell bod y DNA Llawn yn cael ei gwblhau gan yr ysgolhaig dan sylw, a hynny ar ei ben ei hun. Nid yw hyn yn golygu na allwch chi drafod gyda’ch goruchwyliwr (wrth gwrs y gallwch chi) ond rydyn ni am i hwn fod yn gyfle ar gyfer trafodaeth agored a gonest am eich anghenion a’ch disgwyliadau. Nid oes cosb am fod ag anghenion hyfforddi uwch nag ysgolhaig arall. Allwn ni ddim helpu i ddiwallu’ch anghenion os nad ydyn ni’n gwybod amdanyn nhw!
Bydd yr allbwn o’r DNA Llawn yn cael ei rannu gyda’ch goruchwyliwr/goruchwylwyr er mwyn cael eu sylwadau, eu hargymhellion a’u haddasiadau, a fydd yn cael eu trafod gyda chi cyn i’ch cynllun hyfforddiant gael ei bennu’n derfynol. Os oes angen, efallai y byddwch chi’n cael eich gwahodd i drafodaeth rhyngoch chi, eich goruchwyliwr/goruchwylwyr academaidd, ac Arweinydd Hyfforddiant YGGCC i drafod eich cynllun hyfforddiant ar gyfer y flwyddyn i ddod.
Bydd y DNA Llawn hefyd yn ein helpu ni i bennu hyd y dyfarniad fydd ei angen arnoch chi. Rydyn ni’n llunio’r penderfyniad hwn ar y cyd, gan ystyried eich safbwyntiau chi, eich goruchwyliwr, ac Arweinydd Hyfforddiant YGGCC. Yn y pen draw, caiff y dyfarniadau a argymhellir eu hadolygu a’u cadarnhau gan ein tîm rheoli, a nhw sydd â’r gair olaf. Gan fod hyd y dyfarniad yn gallu amrywio ar sail anghenion y myfyriwr, mae angen y cam hwn arnon ni i sicrhau bod cyfanswm y dyfarniadau ym mhob categori hyd yn fforddiadwy i YGGCC.
Rydyn ni’n ailadrodd y DNA Llawn yn flynyddol, fel arfer yn rhan o’r broses adolygu cynnydd ym mhob prifysgol, er mwyn i chi allu dweud wrthon ni am anghenion hyfforddi newydd/gwahanol sy’n codi wrth i’ch rhaglen ddatblygu.
Os oes gennych unrhyw gwestiynau, gallwch gysylltu’n uniongyrchol ag Arweinydd Hyfforddiant YGGCC.
Cyfweliadau
Bydd pob myfyriwr sy’n gwneud cais am ysgoloriaeth YGGCC, os yw’n cyrraedd y rhestr fer, yn cael ei gyfweld gan banel o academyddion yn y llwybr y maent wedi gwneud cais i astudio ynddo. Gellir cynnal cyfweliadau ar-lein neu wyneb yn wyneb. Rydym yn awyddus i gefnogi cyfranogiad gan bob myfyriwr, peidiwch ag oedi cyn rhoi gwybod i’r tîm derbyn myfyrwyr os oes gennych unrhyw addasiadau rhesymol.
Gweminarau ‘Sut i…’
Ym mis Tachwedd 2023, cynhaliodd YGGCC gweminarau ar gyfer myfyrwyr â diddordeb a darpar ymgeiswyr ar ‘Sut i wneud cais’ a ‘Sut i ysgrifennu cynnig ymchwil’.
Isod mae recordiadau o’r sesiynau gweminar hyn.