Mae gan YGGCC swm cyfyngedig o arian sy’n gallu cyfrannu at dreuliau gwaith maes tramor. Os ydych chi’n fyfyriwr YGGCC sy’n cael eich cyllido drwy ESRC, gallwch wneud cais am gyllid tuag at eich costau. Anfonwch eich cais o leiaf dri mis cyn i chi ddechrau ar eich gwaith maes.
Pwy sy’n gymwys
Rydych chi’n gymwys ar gyfer y lwfans hwn os ydych chi’n fyfyriwr llawn amser wedi eich cyllido drwy ESRC yn elfen ddoethurol eich dyfarniad. Nid yw myfyrwyr rhan-amser yn gymwys i hawlio costau gwaith maes tramor oni bai bod y sefydliad lletyol wedi cytuno i newid i statws llawn amser am gyfnod penodol.
- Gallwch wneud un cais yn unig am dreuliau tramor gwaith maes yn ystod cyfnod eich dyfarniad. Ni ellir gwneud ail gais. Gall cais gynnwys nifer o deithiau a/neu wahanol leoliadau, ond rhaid iddo amlinellu cynllun llawn y gwaith maes mewn un achos cydlynol i gael cymorth.
- Rhaid i’ch cais gael ei gefnogi gan eich ysgol a’ch goruchwyliwr.
- Gallwch wneud cais am yr arian hwn os ydych yn gwneud gwaith ymchwil sylfaenol dramor sy’n hanfodol i’ch PhD. Bydd ceisiadau’n cael eu hystyried lle mae achos eich goruchwyliwr am gymorth yn darparu digon o dystiolaeth bod y gwaith maes tramor yn hanfodol i’ch ymchwil.
- Dylai’r gwaith maes tramor arfaethedig fod wedi’i amlinellu yn eich cais ymchwil gwreiddiol. Gellir ystyried cais am gyllid gwaith maes mewn achosion eithriadol os bydd prosiect wedi newid yn sylweddol ers y cais gwreiddiol am ysgoloriaeth, ac nad oedd gwaith maes yn rhan o’r cynnig gwreiddiol.
- Dylai’r gwaith maes tramor arfaethedig naill ai fod wedi cael ei hamlinellu yn eich cais ymchwil gwreiddiol neu ar ddiwedd blwyddyn gyntaf dyfarniad 1+3.
- Os oes gennych ysgoloriaeth ymchwil ddoethurol ynghlwm wrth grant ymchwil ESRC eich goruchwyliwr, bydd unrhyw waith maes yn cael ei gyllido drwy grant eich goruchwyliwr, ac ni fyddwch yn gymwys ar gyfer y lwfans hwn.
- Ni fydd unrhyw gyfraniad tuag at gostau’r gwaith maes yn cael ei awdurdodi os bydd y Swyddfa Dramor, y Gymanwlad a Datblygu (FCDO) yn cynghori yn erbyn ymweld â’r wlad dan sylw. Mae arweiniad pellach ar gael ar dudalennau gov.uk ar basportau, teithio a byw dramor. Y myfyrwyr sy’n gyfrifol am wneud yn siŵr eu bod wedi gwneud y trefniadau fisa angenrheidiol ar gyfer teithio rhyngwladol. Dylid gofyn am gyngor gan Swyddfa Ryngwladol y Brifysgol sy’n eich cynnal, neu gorff cyfatebol. Mae’n bosibl y bydd cyfyngiadau teithio ychwanegol ar fyfyrwyr sy’n astudio dan fisa Haen 4, a dylent ofyn am gyngor.
- Ni ystyrir ôl-hawliadau am dreuliau gwaith maes tramor.
Mae’n rhaid i chi gydymffurfio â pholisi eich prifysgol ar iechyd a diogelwch mewn gwaith maes a chynnal asesiadau risg priodol, fel sy’n ofynnol, cyn dechrau ar unrhyw waith maes. Gofynnwch i’ch ysgol neu eich Swyddfa graddedigion am ragor o wybodaeth.
Beth sydd wedi ei gynnwys dan y lwfans?
Mae’n rhaid i’r gwaith maes tramor fod yn rhan annatod o’ch PhD a rhaid iddo gael ei gynnal yn ystod cyfnod y dyfarniad. Diben yr ymweliad fydd cynnal ymchwil sylfaenol, fel ymchwil archifol neu waith maes sy’n hanfodol er mwyn cwblhau eich traethawd yn llwyddiannus. Ni fydd ysgoloriaethau ymchwil yn cael eu hymestyn i adlewyrchu cyfnodau yn y maes. Ni ddylid ymgymryd â gwaith maes yn ystod tri mis diwethaf y dyfarniad.
Bydd ymweliadau gwaith maes tramor yn para llai na 12 mis fel arfer. Fodd bynnag, os gellir dangos bod achos cryf dros ymweliad sy’n para mwy na deuddeng mis, gellir ystyried hyd at 18 mis o waith maes.
Os cymeradwyir gwaith maes tramor sy’n para mwy na naw mis, gallai fod yn briodol eich bod chi’n dychwelyd un waith i’r Deyrnas Unedig hanner ffordd drwy gyfnod gwaith maes yr ymchwil. Rhaid i hyn gael ei ariannu drwy ddefnyddio’r lwfans a roddir. Ni ellir rhoi estyniad i gyfnod y gwaith maes i wneud iawn am yr amser a dreuliwyd yn dychwelyd i’r Deyrnas Unedig. Fodd bynnag, disgwylir i chi gyfathrebu â goruchwylwyr drwy gynnal cyfarfodydd ar-lein (Teams, Zoom, Skype ac ati), felly efallai na fydd angen i chi ddychwelyd yn ystod y gwaith maes.
Nid yw’r lwfans tramor yn cynnwys treuliau unrhyw aelod o’r teulu sy’n dod gyda chi.
Ni fydd y lwfans tramor yn cael ei gynyddu i dalu am dreuliau ychwanegol ar ôl i chi ddechrau ar eich gwaith maes.
Costau Gwaith Maes Tramor
Dylai myfyrwyr a’u goruchwylwyr gydweithio i gyflwyno ceisiadau sy’n seiliedig ar gostau rhesymol a chywir. Dylai’r rhain gynnwys cymaint o fanylion â phosibl, gan gynnwys cyfiawnhad priodol o gostau lle bo’n berthnasol.
Mae’r treuliau safonol a ganiateir yn cynnwys:
- Teithio Rhyngwladol: Teithio i leoliad y gwaith maes tramor ac oddi yno
- Teithio Mewnol: Mae disgwyl i fyfyrwyr ddefnyddio trafnidiaeth gyhoeddus lle bynnag y bo modd. Os nad oes opsiynau trafnidiaeth gyhoeddus ymarferol, neu os oes pryderon ynghylch y drafnidiaeth sydd ar gael, bydd angen cyfiawnhau trefniadau amgen.
- Llety: Gofynnwch i’r sefydliad sy’n eich cynnal a yw eu polisi teithio yn caniatáu archebion AirBnB cyn gwneud cais. Gofynnir i chi gadarnhau eich bod wedi cwblhau unrhyw restrau gwirio angenrheidiol, a allai fod yn ofynnol gan eich sefydliad cartref, i ddangos bod cyn lleied o risg â phosibl.
- Treuliau teithio ac iechyd cysylltiedig: Telir am fisâu teithio a thrwyddedau ymchwil fel arfer, yn ogystal â brechiadau a argymhellir nad ydynt ar gael am ddim gan y GIG. Rhaid i fyfyrwyr gael cadarnhad gan eu sefydliad eu hunain ynghylch yswiriant teithio gan y bydd polisïau’r Brifysgol yn aml yn talu am deithiau myfyrwyr.
- Cynhaliaeth: Mae disgwyl i fyfyrwyr ddefnyddio eu cyflog i dalu’r treuliau hyn. Caiff y cyflog ei dalu’n barhaus yn ystod Ymweliadau â Sefydliadau Tramor. Bydd ceisiadau am gymorth rhannol yn cael eu hystyried mewn achosion pan fo costau byw yn sylweddol uwch nag yn y DU. Argymhellir defnyddio numbeo i roi tystiolaeth o’r gwahaniaeth mewn costau byw a gellir gwneud cais am ragor o arian ar gyfer cynhaliaeth i adlewyrchu’r gwahaniaeth canrannol hwn.
Os oes angen i chi brynu offer, talu pobl i gymryd rhan neu dalu am gymorth trawsgrifio a chyfieithu yn rhan o’ch gwaith maes, gall y Grant Cymorth Hyfforddiant Ymchwil eich cynorthwyo.
Sylwch:
- Unwaith y bydd lwfans y gwaith maes wedi’i ddyrannu, cyfrifoldeb y myfyriwr fydd rheoli’r cyllid. Ni chynyddir y rhain i dalu costau eraill a ddaw i ran myfyriwr tra bo dramor. Os caiff y gwaith maes ei adael, ei leihau neu os bydd yn aflwyddiannus, gan olygu bod y myfyriwr yn dychwelyd i’r Deyrnas Unedig yn gynnar, bydd lwfans YGGCC yn cael ei ostwng yn unol â hynny. Bydd cymorth YGGCC yn cael ei gyfyngu i dalu am gostau unrhyw wariant rhesymol a gafwyd eisoes.
- Dylai’r myfyrwyr ddilyn prosesau sefydliadau lleol ar gyfer trefnu a rheoli trefniadau teithio. Cysylltwch â’r ysgol/adran sy’n eich cynnal i gael gwybod a oes rhaid i chi ddefnyddio darparwr teithio eich sefydliad i wneud trefniadau teithio.
- Unwaith y bydd YGGCC wedi cymeradwyo cais, bydd sefydliad cartref y myfyriwr yn gweinyddu’r trefniadau talu. Mae’n ofynnol i chi ddilyn y canllawiau ar hawlio treuliau ac ad-daliadau gan eich sefydliad cartref. Mae’n rhaid darparu derbynebau ar ôl dychwelyd o ymweliad gwaith maes tramor. Bydd YGGCC yn trosglwyddo cronfeydd gwaith maes a gymeradwywyd i’ch sefydliad cartref ar ôl cael datganiad terfynol o’r gwariant, yn ogystal â derbynebau ategol. Os bydd y treuliau’n uwch na’r cyfraniad a gytunwyd gan YGGCC, bydd angen defnyddio ffynonellau eraill i dalu am unrhyw wariant dros ben sydd y tu hwnt i’r swm a gymeradwywyd. Gallwch ddefnyddio eich Grant Cymorth Hyfforddiant Ymchwil i ychwanegu at lwfans y gwaith maes tramor.
- Rhaid i fyfyrwyr ofyn am ganiatâd ymlaen llaw gan YGGCC os bydd angen ailbwrpasu unrhyw arian sydd heb ei wario.
- Os bydd unrhyw newidiadau i gynlluniau eich gwaith maes, rhowch wybod i YGGCC gan fod angen manylion amserlen ddiwygiedig y gwaith maes arnom.
Sut i wneud cais
Gofynnir i fyfyrwyr sy’n gwneud cais i gynllun gwaith maes tramor YGGCC gadarnhau eu bod yn cadw at bolisïau perthnasol eu sefydliad cartref. Yn ystod eu hamser dramor, rhaid i fyfyrwyr ddilyn unrhyw argymhellion sy’n deillio o asesiad risg eu Prifysgol a chadw at unrhyw bolisi neu ganllawiau a gyhoeddir. Fel arfer, dylai teithio ddod o dan bolisi yswiriant teithio’r sefydliad sy’n eich cynnal. Siaradwch â’r adran/sefydliad sy’n eich cynnal am y broses hon.
Mae’r cais gwaith maes tramor ar gyfer cyfraniad tuag at gost ymweliad gwaith maes tramor. Gan mai dim ond ychydig o arian sydd ar gael, ni fydd yr holl gostau’n cael eu talu o reidrwydd. Mae dyrannu’r arian ar gyfer gwaith maes yn unol â’n disgresiwn, a bydd grŵp rheoli PHD Cymru yn goruchwylio’r broses.
Bydd angen i chi lenwi ffurflen gais gwaith maes tramor YGGCC ac anfon y ffurflen wedi ‘i chwblhau drwy e-bost i enquiries@wgsss.ac.uk.
Caniatewch o leiaf dri mis rhwng cyflwyno cais a dechrau’r gwaith maes tramor. Rydym fel arfer yn disgwyl y byddwn ni’n rhoi gwybod am benderfyniadau cyllido o fewn dau fis i’r cais.
- Llwythwch i lawr ffurflen gais gwaith maes tramor YGGCC